Austurvegur 1

LF-fasteignasala/Lindin fasteignir s. 893-1319 og Þórdís Pála Reynisdóttir löggiltur fasteignasali thordis@lf-fasteignasala.is kynna:
Austurvegur 1, Reyðarfirði efri hæð. Eign sem vert er að skoða.
3 íbúðir eru í húsinu sem stendur á 1.650 m² leiuglóð í fallegu umhverfi í miðbæ Reyðarfjarðar.
ATH. Lokaútekt er ekki komin á húsið og því eru matstölur enn lágar. Stutt er í að lokaúttekt klárist.
Húsið hefur í gegnum tíðina hýst ýmsa starfsemi, fyrst barnaskólann á Reyðarfirði og er af eldra heimafólki gjarnan kallað gamli skólinn, síðar voru hreppsskrifstofur Reyðarfjarðar í húsinu og Lestrarfélag Reyðarfjarðarhrepps og síðast félagsmiðstöð fyrir unglinga.                                                    Húsið hefur nú verið gert upp á fallegan hátt og fengið nýtt hlutverk sem þriggja íbúða hús í hjarta bæjarins.
Húsið hefur að miklu leyti verið endurnýjað að innan. Allar raflagnir, heimtaug, rafmagnstöflur, ljós og tenglar hefur verið endurnýjað. Öll lýsing er dimmanleg og tengd Plejd hússtjórnarkerfi. Innfelld óbein lýsing er meðfram útveggjum í öllum rýmum á norður- og suðurhlið.  
Búið er að leggja ljósleiðara inn í húsið.
Ný heimæð fyrir kalt vatn hefur verið lögð inn í húsið, allar vatnslagnir, hreinlætistæki og hitatúbur er nýtt. Rafmagnskynding er í íbúðinni með nýjum ofnum. Frárennslislagnir hafa allar verið endurnýjaðar innanhúss og út í nýjan safnbrunn í lóð. Sameiginlegt inntaks- og tæknirými er staðsett í nýrri viðbyggingu á jarðhæð.
Óvenju mikil lofthæð er í íbúðinni eða um 3,4 m. Sunnanmegin er gott útsýni yfir fjörðinn úr svefnherbergi, stofu og eldhúsi. Norðanmegin er útsýni úr svefnherbergi, anddyri og baðherbergi upp til fjalla.
Sérinngangur er í íbúðina á 2. hæð af rúmgóðum 15 m² svölum sem eru yfir nýrri viðbyggingu.                                                                                      Á svölunum er hægt að koma fyrir útihúsgögnum og grilli.
Innra skipulag:
Af svölum er komið er inn í flísalagt anddyri með góðum fataskápum. Inn af anddyri er flísalagt þvottahús með nýrri innréttingu þar sem gert er ráð fyrir þvottavél og þurrkara í vinnuhæð.  
Frá anddyri er komið í bjart og rúmgott alrými sem er stofa, borðstofa og eldhús með harðparketi á gólfum. Ný eldhúsinnrétting með nýjum tækjum í eldhúsi. Innbyggð uppþvottavél og innbyggður ísskápur fylgja íbúðinni. Innfelld lýsining í loftum og innfelldur ljósakappi meðfram útvegg. 3 stórir og mjög háir gluggar eru á alrýminu.
Úr gluggunum er flott útsýni út á fjörðinn.
Svefnherbergin eru tvö með stórum og háum gluggum, rúmgóðum fataskápum og harðparketi á gólfum. Í svefnherbergjum er dimmanleg innfelld lýsing og innfelldur ljósakappi meðfram útvegg yfir gluggum. Nettenglar eru í herbergjum og stofu fyrir möguleika á að tengja sjónvarpstæki.     Neyðarútgangur er út um glugga í minna svefnherberginu.
Baðherbergi er að hluta til flísalagt og með stórum glugga, rúmgóðri sturtu, upphengdu salerni með innbyggðum wc kassa og nýrri baðinnréttingu í dökkum viðarlit. Innfelld dimmanleg lýsing og ljósakappi.
Ytra byrði:
Að utan hafa allir gluggar verið yfirfarnir, allt gler, glerjunarlistar og opnanleg fög endurnýjuð og gluggar málaðir. Þak er yfirfarið og viðgert, nýr þakpappi og ný lektuð lituð þakklæðning. Nýr þakkantur, nýjar þakrennur og niðurföll. Skorsteinar á þaki viðgerðir og klæddir með álklæðningu. Múrkerfi utanhúss er yfirfarið, múrviðgert og húsið heilmálað. Ný viðbygging með standandi viðarklæðningu hefur verið byggð við húsið í stað eldra skyggnis. Í viðbyggingu er inngangur íbúðar á jarðhæð ásamt sameiginlegu tæknirými. Á þaki viðbyggingar eru svalir, sérafnotareitur efri hæðar.
Verið er að fjarlægja eldri steyptar stéttar og verða gönguleiðir hellulagðar frá inngöngum íbúða að sorptunnuskýli og bílstæðum. Lóð er jöfnuð og tyrfð að sunnanverðu en heldur sér óbreytt með sjálfsprottnum gróðri að norðanverðu. Eldri steinhleðsla og tröppur frá götu að sunnanverðu hefur verið lagað. Eitt merkt bílastæði fylgir hverri íbúð, ídráttarrör liggur frá tæknirými að hverju stæði fyrir mögulega tengingu á rafhleðslustöð. Norðan við hús er malarplan með möguleika á viðbótar bílastæðum.                                                                                                                                                Við enda bílastæðis meðfram götu verður sameiginlegt sorptunnuskýli.
Arkþing / Nordic House of Architecture teiknaði breytingar á innra skipulagi. Einnig fylgja með teikningar frá Arkþing af þremur rúmgóðum, sambyggðum bílskúrum norðanmegin við húsið sem ekki hafa verið lagðar inn til umsagnar byggingarfulltrúa.
Hér er um að ræða einstaka eign í sögulegu húsi á besta stað í bænum með alla helstu þjónustu í göngufæri. :